వధువు కావలెను

ఓ పెద్ద కంపెనీలో ఆకర్షణీయమైన జీతము అందుకుంటున్న వరునకు అందమైన, చురుకైన, P.G. చదివిన వధువు కావలెను.

ఏడడుగుల బంధానికి వధువుకు ఉండవలసిన ఏడు లక్షణాలు:

1)ఆస్తిలేమీ లేకపోయినా అప్పులుండకూడదు. కాని హైదరాబాద్ లో ఓ యిల్లు, లేదా 2,3 చోట్ల స్థలాలు ఉంటే చాలు.

2)అన్నదమ్ములు, అక్కచెల్లెళ్ళు ఒకరు ఉంటే మంచిది. లేకుంటే మరీ మంచిది.

3)వరునికి ఇష్టం లేనప్పుడు ఉద్యోగం మానేసి, ఇష్టం ఐనప్పుడు ఉద్యోగం సంపాదించుకునే తెలివితేటలు ఉండాలి.

4)ఉద్యోగం చేస్తున్నా ఇంటి భాద్యతలు పూర్తిగా నిర్వర్తించాలి.

5)వరకట్నం ఇచ్చే విషయం మీ ఇష్టం కాని వధువుకు వారి తల్లిదండ్రులు ఏమైనా సమర్పించుకోవచ్చు. పెళ్ళి మాత్రం ఘనంగా చేయాలి.

6)వస్త్రధారణ పూర్తిగా మా ఇష్టానుసారంగా ఉండాలి.

7)డిగ్రీలు, ఉద్యోగాలు సంపాదించడమే కాదు వంటా వార్పు కూడా తెలిసుండాలి.

• ఈ ప్రకటన చాలా మందికి కోపం తెప్పించిఉండవచ్చు. కానీ ఆడపిల్లలు, వారి తల్లిదండ్రులుకు మాత్రం ఈ ప్రకటన బాగా తెలుసు. స్త్రీ ఎంత చదువుకుని ఉద్యోగం చేస్తున్నా వంటింటి పనులు పూర్తిగా ఆమే చేయాలి. అది ఆమె భాధ్యత. పురుషులు ఎంత చిన్న పని చేసినా అది సహాయమే అవుతుంది కాని భాద్యత కాదు. ఇది నిజంగా నిజం ఎవరైనా కాదంటారా?
• వరకట్నం వద్దు అనేవారు చాలా అరుదుగా ఉన్నారు. ఒకవేళ వద్దు అన్నా పేరు మారుతుంది కాని లాంచనంగా మాత్రం తీసుకుంటున్నారు.
• వివిధ రంగాల్లో ఉద్యోగాలు చేసే మహిళలకి ఆయా ఉద్యోగాల రీత్యా వస్త్రధారణ ఉంటుంది. కానీ అది కూడా ఆక్షేపణల నడుమ నలిగిపోతుంది.

నా ఈ పోస్ట్ చదవుతుంటే ఎంతో మందికి కోపం రావచ్చు. కానీ ఈ పోస్ట్ రాయడానికి ముందు కొన్ని 100ల మంది దగ్గర అభిప్రాయాలను సేకరించాను నేను . వారిలో పెళ్ళి కాని స్త్రీ,పురుషులు ,పెళ్ళి ఐన స్త్రీ, పురుషులు, ఉద్యోగం చేస్తున్న ఆడవారు, ఉద్యోగం చేయని ఆడవారు కూడా ఉన్నరు. కేవలం ఈ పొస్ట్ నా అభిప్రాయ మాలిక కాదు. ఎంతో మంది మనసుపొరలలోని ఆశల రూపం ఈ పోస్ట్.